بوسة لشفاف اللطرون ـ شعر : سيمون عيلوطي

بوسة لشفاف اللطرون ـ شعر : سيمون عيلوطي





(الى الشاعر محمود درويش.. بدون مناسبة ، وفي كل مناسبة)


احمل راياتك ارجع ابدا من هون
هاي الارض
الحلم
الوعد
بدونك لا طعم ولا لون
جيب بعبك وعد النجمي
وطن الكلمة
عشق الورد
وبوسي لشفاف اللطرون
***
رحلة عمرك بين البر البحر
ورعش البرد بليلك
في غربة كانون
زتتني بثلج الغربي
ببلادي ادور عن دربي
عن دقة قلبي عن حبي
بالبروة* داير مجنون
***
حملت بلادك لما وقعت
من شباك الدنيا بعيني
لا انت ركعت ولا هي ركعت
فزت تنده وينك ويني
اسود البدر
اصفر الفجر
وفلت من عنا لجنيني
شو رغرغ بالدمع الكون
***
حيفا حدفت موجي عندك
ماجت كرجت نطت حدك
طلت يافا توافي وعدك
عن وجناتي تلملم دمعك
ظلت تسرق غنوي منك
شو غناها هالحسون
ارجع النا
الارض
الورد المجد
الوعد بدونك
لا طعم ولا لون
(الناصرة)


الشاعر سيمون عيلوطي

جزاك الله خيرا وبارك الله لك وعليك