شاعر الإبداع القدير علي أبو ماجد رحمه الله تعالى /ناصر المجماج

عشاق فتح الأربعاء أغسطس 06, 2008 2:08 pm

شاعر الإبداع القدير علي أبو ماجد رحمه الله تعالى /ناصر المجماج

--------------------------------------------------------------------------------

الشاعر القدير علي أبو ماجد رحمه الله تعالى

وهو من أهالي عنيزة بالقصيم

عاش يتيم الأم وكان والده يقسو عليه كثيرًا ففر من بلده واستقر بمكه حتى وفاته عام 1386هـ رحمه الله

شاعر جياش العاطفة جزل المعنى سلس اللعبارة اشتهر بالمحاورة والنظم وحفظ له الرواة الكثير الكثير من أبياته

من طرائف شعره ما قال يسند على ابنه ماجد:

اسمع ياماجد يالولدي=ماودي تغر وعدي
لاقلت إلك إيت أقض اللازم=تجي من ملعبك تعدي
وإلا جيت ورحت وجيت=رح زمر كنك باستدي
في فرغاتك ، وإلا المكتب=على التلميذ أبدى بدي
والخميس ويوم الجمعة=ييزنك لعبٍ وطردي
فيهن تبي تشرح ثوبك=والطاقية منك تغدي
تظهر كنك ولد الكعكي=وتدخل كنك ولد قعدي
وأنا ماعمري هاوشتك=ولا طخطختك في يدي
إن أقبلت أضحك في وجهك=وإن أقفيت أقول بعدي
حيث إن الوالد كد طقن=طقن عن حيلي وجهدي
عنده محجان للقربه=ووزان المحجان وتدي
يعلقني مثل العكه=ولا أدري وشلون أغدي
يطقن طق ما أطيقه=طقٍ يدلع غرب جلدي
أصيح من أول باكوره=ويخلب برقي ورعدي
تجي الخالة تتفزع لي=وتعود من قولة ددي
لو إن أمي عندي حية=ماطاح بيارقي تعدي
وهو طقه حب ظاهر=يحسب إن الطق يهدي
والطق يوحش وينحش=خليته وأرخصت بلدي
طيرت بجنحان الغربة=مثل اللي بالرمي محدي
كثر الأمراض أصل الحكمه=علمٍ ما سواه ربدي
وذا من حظك ياماجد=وإلا أبيك حظه ردي

كما أن له القصيدة المشهورة التي أرسلها لأخيه مقبل بالجوف يهنئه بزواجه ويقول فيها

ياأهل الموتر اللي من تحت ماهية محمد المرشودي=من فضايلك يالسواق خذ خطي ترى الخط خارق عاده
لاوصلتوا سكاكا الجوف من معروفكم فابدوا المجهودي=سلموا لي على مقبل سلام العبد لا واجهوه أسياده
ثم قولوا مبارك ويتبارك مشترى دفة الماهودي=واعساها عليه من النواصي اللي تقود السعد بقلاده
وإن نشدكم عن المملوك قولوا له ترى ماعنه منشودي=مستصح البدن لاشك وقته حابل له بفخ وصاده
بالحجاز أتجبر وأتعبر وأتصبر وأنا ملهودي=وأتحزم ببارودي وأجاهد شن يغث الركيك جهاده
والله إن الله أبرك لكن إني خابرٍ إنك تشد عضودي=ياسهيل النجوم اللي إلى منه ظهر كذب العداده
وله القصيدة المشهورة التي يقول في مطلعها:
عفى الله عن عين على السهر حدها=ليال كتوم ما تخبر بسدها
إلى صفت ساعة زمان على القسا=لابد ما تأخذ على الطول ضدها
إلى أن يقول:
لاشك أبا أوصيك ياملفت النظر=إلى خفت من دعوى تجاسر وبدها
وإلا شفت من ربعك ملل لا ترومهم=اقلط على عقدت غلاهم وهدها
وإلا قابلوك بنصح بالنصح لاقهم=وإلا قيل ذي حروة رضاهم تعدها

إلى آخر القصيدة

أما قصيدته التي قالها ونتعبرها توبته فهي:

يقول المزاول والزوال وكاد=الأقدار تجري والطريق قصاد
لابد من يومٍ يزل إبه القدم=والروح طير وكل طير يصاد
نغالي بهالدنيا وحنا عمارنا=عواري لمجناها القديم تعاد
مثل لهبة شبت بليلة وجمرت=والصبح يذراها الهبوب رماد
أقوله وأنا اللي واطيٍ خطة الخطر=مثل الذي ياطا السريح عناد
تهاونت في ديني بدنياي بالجهل=وأنا والله إني من عيال أجواد
أرجي إله العرش ماخاب من رجا=علام مايخفى بكل فواد
ربٍ بسط سبعٍ بحكمه ودبرته=وسبع معلقهن بغير عماد
أرجيه ثم أرجيه يدمح زلتي=ويمحى بنور الدين كل سواد
من خلف ذا أوصيك ياسامع المثل=وصاة يدرجها عليك استاد
إن وافقت ترى ثمنها قبولها=وإلا فعلى راع الوصاة رداد
احسب حساب إنك مسافر عن الوطن=غريب دار وللغريب بلاد
لابد ماترحل على السرع والبطا=لاركبت الدسته على العداد
العود له ساعة وللطفل مثلها=كبير وإلا بالمهاد ولاد
إن طعتني دور عن الضيق بالسعه=هذي خلاصة كيره الحداد
عليك خمس فروض مفروض وقتها=الله لعبده حدد الميعاد
إلى دعا داع الفلاح اسمع الندا=اغسل وصل بخاطرٍ منقاد
ولاتهاون برمضان وصومه=تقضي على دينك بلقمة زاد
هن النفس عن نوهاتها وشهواتها=ترى النفس تبي من اللزوم جهاد
والحج مفروضٍ على اليسر والسعة=على كل حيٍّ ينطح المسناد
هني من حج الفريضة وزادها=للبيت والبيت الشريف يعاد
واحفظ لسانك لاتطول له المدى=ترى اللسان أمضى من البولاد
والصدق خله لك حصان على الطلب=ترى الكذب خيبه لاتقول جواد
ياسرع ماياقع على الخد صاحبه=لوهو مثل عنتر بن شداد
ولا تصحب الخيبه ولا تضمر الردى=وخذ عن دروب المشكلات حياد
والجار له حق على الجار بالوفا=لاخيب الله سيرة الأمجاد
والمال زك المال ثم ادفع البلا= من مابقى وإلا عساه نفاد
في ظل عاهلنا سعود الأول=اللي بعهده كل شي ساد
جزا الله راع الخير بالخير والثنا=منا لمن له بالجميل آياد
سهرٍ على شعبه وسهرٍ فيصل=بالمصلحة وإحباط كل فساد
المملكة تاهت ولبست مصاغها=أعيذها بالله من الحساد
إن قلت مصر أو شام ما أدركت وصفها=ولبنان والإردن على بغداد
وإن قلت واشنطن ولندن مع أسمرا=والصين واللي من وراهن غاد
أو موسكو والسند والهند والحبش=أيضا وغلقهن بجنة عاد
بالوصف والتمييز والقدر دونها=جميع وإلا يعرضن أفراد
الله فرض على العموم احترامها=حيث إنها هي قبلة العباد
وختامها بأزكى صلاة على النبي=ماهل وبل وحلتم الرعاد
والآل والأصحاب ما يجري النظر=أوما جرى خط القلم بمداد